មន្ត្រីជាន់ខ្ពស់ក្រសួងសេដ្ឋកិច្ច ណែនាំដល់ប្រធានរតនាគារខេត្តបន្ទាយមានជ័យថ្មី ត្រូវខិតខំអនុវត្តការងារឱ្យបានល្អ
បន្ទាយមានជ័យ៖ រតនាគារខេត្តបន្ទាយមានជ័យ បានរៀបចំពិធីប្រកាសតែងតាំង និងចូលកាន់មុខតំណែងប្រធានរតនាគារខេត្តបន្ទាយមានជ័យថ្មី ពិធីនេះធ្វេីឡេីងនៅសាលាខេត្តបន្ទាយមានជ័យក្រោមអធិបតីភាពលោក ប៉ូ រតនា អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ តំណាងលោកឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អូន ព័ន្ធមុនីរ័ត្ន ។
ដេីម្បីពង្រឹងការអនុវត្តមុខងារ និងភារកិច្ច របស់ថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ឱ្យបានល្អ លោក ប៉ូ រតនា បានណែនាំដល់ប្រធានរតនាគារដែលទេីបចូលកាន់មុខតំណែងថ្មី អនុវត្តនូវអភិក្រមការងារ ៤ប្រការ រួមមាន៖ ទី១-អនុវត្តការងារប្រកបដោយវិជ្ជាជីវៈ និងគោរពក្រមសីលធម៌វិជ្ជាជីវៈ ត្រូវមានមនសិការវិជ្ជាជីវៈ និងប្រកាន់ខ្ជាប់នូវគោលការណ៍អភិបាលកិច្ចល្អ។ ទី២-អនុវត្តការងារជាក្រុម បំពេញការងារដើម្បីបម្រើឧត្តមប្រយោជន៍ នៃការពង្រឹងស្ថាប័ន និងយន្តការការងារ ដោយយោងលើស្មារតីនៃការគោរពឋានានុក្រម មុខងារ និងភារកិច្ចរៀងៗខ្លួន ព្រមទាំងស្មារតីសាមគ្គីភាព និងឯកភាពរឹងមាំ ទាំងផ្នែកទស្សនៈ គោលជំហរ និងសកម្មភាព។ទី៣-អនុវត្តការងារដោយប្រកាន់ខ្ជាប់ស្មារតីបុរេសកម្ម និងគោលការណ៍ប្រសិទ្ធភាពថវិកា មិនបង្កើតបញ្ញា បង្ការទប់ស្កាត់បញ្ហាមិនឱ្យកើតមាន ដោះស្រាយបញ្ហាទាន់នៅតិចតួច និងអនុវត្តការងារ ដោយប្រកាន់គោលការណ៍តុល្យភាពរវាងការវិភាជន៍ថវិកា និងសមិទ្ធផលឱ្យបានខ្ជាប់ខ្លួន។ ទី៤-មិនត្រូវមើលរំលងកំហុសខ្លួនឯង ទទួលស្គាល់ និងកែតម្រូវកំហុសរបស់ខ្លួនដោយអនុលោមតាម អភិក្រមការងារ ៥ យ៉ាង របស់ សម្តេចអគ្គមហាសនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាគី “ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់"។
សូសូមបញ្ជាក់ផងដែរថា លោក អឿន ច័ន្ទវិសុទ្ធ ត្រូវបានប្រកាសចូលកាន់មុខតំណែងជាប្រធានរតនាគារខេត្តបន្ទាយមានជ័យថ្មី ជំនួសលោក យុត ស្វិនី ប្រធានរតនាគារខេត្តបន្ទាយមានជ័យចាស់ ត្រូវបានចូលនិវត្តន៍៕
